[申情申音]虾仁•欢迎——谈谐音文化

作者、朗读：丁迪蒙

图片来自网络

载新民晚报 2013年6月2日

    前几天辣一家饭店吃饭。冷盆先上，吃脱一歇以后就开始上热炒了。我留意了一下，伊拉上个头道菜竟然是清炒虾仁！

    交关年数了，到饭店去吃饭也是常庄有个事体，但是头道上“虾仁”个搿种作派已经长远勿看见了！

    心里向一记头一阵激动！

    讲到此地块，大概有人会得想：搿有啥啦！不过是只炒虾仁呀！有啥好激动个啦！

实际浪，“虾仁”作为头道热炒菜来上是大有深意个！

    大家侪晓得，中国人最欢喜讨口彩了，上海人看望生重病个人勿能送苹果，就因为搭“病故”谐音。过年吃年夜饭，鱼是勿好全部吃光个，叫吃剩有鱼（余）。所以讲谐音是阿拉汉民族最讲究个文化现象。

    “虾仁”搭“欢迎”辣老派上海闲话里也是同音。饭店先上“虾仁”取个是“欢迎”各位光临个意思，搿是邪气道地个上海本帮饭店再想得出来个谐音文化。伊带拨食客个是一种宾至如归个感觉。老上海只要看到搿能个上菜顺序侪会得会心一笑个。

    还有只谐音搿搭也顺带便讲一讲。

    各位认为：“帆船”个“帆”应该哪能读？是读“翻”还是读“凡”呢？有趟听上海人民广播电台节目，主持人用沪语朗读了李白个《黄鹤楼送孟浩然之广陵》。其中有句“孤帆远影碧空尽”，伊是拿“帆”读成“翻”个。搿个勿对个，上海闲话应该读“凡”。从各地方言个读音来看，“帆”也大部分读成“凡”个。

    讲到搿搭，大概有人会得想，普通话也是读成“翻”个呀！其实，搿是辣对普通话进行审音规范个辰光只考虑从众，没考虑到谐音而造成个问题。

    从语言文化个角度来看，以前筷子叫“箸”， 辣明代改称“筷”。因为“箸、住”谐音，容易让人联想起“停滞”，所以改叫了“快”。 大家想，船浪人吃饭个辰光连得鱼身也不好翻个，船“翻”脱了哪能来三呢！搿种谐音是吓得煞人个！

我们最近还发过：

[麦唐作]“油而不腻”

[麦唐作][麦唐白话]微信投票

[申情申音][表演唱]推开梅园小区门

[嘉人嘉音]手手要汏清爽噢

[申情申音]老底子个霞飞路

[嘉人嘉音][儿歌]打电话

[麦唐作]麻辣烫

【申情申音】本栏目以沪语朗读为主打，文字来源可原创，也可选取其他老师的优秀文章进行适度改编（尽量取得原作者的授意，如暂未能及时联络得上，也将尊重其原文著作）。

申音悠悠，好文共赏。

本公众号发布内容（包括音频及未注明“来源”的文字、图片）皆为原创，作者保留对作品的著作权。未经授权允许，不得擅自转载。

如有需要转载或其他工作邀约：

可添加微信号：Leslie_0207 

或邮件：leslie_0207@163.com

多谢您的支持和欢喜！